0 8000 12 11

Մարդու իրավունքների պաշտպանության անվճար թեժ գիծ
menu

Նոյեմբերի 1: Ադրբեջանական զինուժի թիրախում են եղել նաև Շուշի մշակութային և կրթական օբյեկտները

November 2, 2020

Գործունեություն | Խաղաղասիրություն | Ծրագիր։ ՀՔԱ Վանաձորի գրասենյակի կայունությունը՝ ՀՀ-ում ժողովրդավարության և մարդու իրավունքների մարտահրավերների լույսի ներքո 2020 | Կոնֆլիկտների խաղաղ կարգավորում | Հրապարակումներ | Նորություններ

ԱՀ/ԼՂ արտակարգ իրավիճակների պետական ծառայությունը տեղեկացրել է, որ հոկտեմբերի 31-ի լույս նոյեմբերի 1-ի գիշերն անհանգիստ է եղել ԱՀ/ԼՂ-ի Մարտունի քաղաքում և հարակից բնակավայրերում։ Քաղաքի վրա կիրառվել է ռազմական ավիացիա։ Ռմբակոծության հետևանքով կան բազմաթիվ ավերածություններ։ Մարտունու ուղղությամբ ադրբեջանական զինուժի վայրագությունը վերսկսվել է նաև լուսաբացին։ Գիշերը հրետակոծվել են ԱՀ/ԼՂ Ասկերանի վերին ենթաշրջանի գյուղերը։ «Գրադ» և «Սմերչ» կայանքներից ադրբեջանական զինուժը կրակ է բացել Ավետարանոց և Սզնեք համայնքների ուղղությամբ։ Քաղաքացիական բնակչության շրջանում տուժածներ չկան։ Նյութական վնասների չափը ճշտվում է։

 

ԱՀ/ԼՂ պաշտպանության բանակը տեղեկացրել էր, որ գիշերվա ընթացքում մարտական գործողություններին զուգահեռ, ադրբեջանական զինուժը շարունակել է թիրախավորել խաղաղ բնակավայրերը, մասնավորապես՝ հրթիռահրետանային հարվածներ հասցնելով ԱՀ/ԼՂ-ի Մարտունի, Շուշի քաղաքներին և Քարին տակ գյուղին: Ադրբեջանական զինուժը 10 միավոր տեխնիկայով առաջանալու փորձ է ձեռնարկել Ավետարանոց-Սղնախ հատվածում, սակայն, խոցվելով բանակային ուժերի կողմից և կրելով մեծաթիվ կորուստներ, հետ է շպրտվել:

 

Հայկական միասնական տեղեկատվական կենտրոնը տեղեկացրել է, որ երեկ երեկոյան ադրբեջանական զինուժը հարձակման փորձեր է կատարել ռազմաճակատի ամբողջ երկարությամբ: Հատկապես ինտենսիվ են եղել Մարտունու և Շուշիի ուղղություններով։

 

Հայկական միասնական տեղեկատվական կենտրոնը տեղեկացրել է, որ նոյեմբերի 1-ին օրվա ընթացքում Ադրբեջանը շարունակել է կրակի տակ պահել Արցախի խաղաղ բնակավայրերը։ ԱՀ/ԼՂ-ի Մարտունի քաղաքը և շրջանի հարակից գյուղերը ենթարկվել են ավիառմբակոծությունների։ Տուժածներ չկան, իսկ ավերածությունների հետևանքով վնասների չափը ճշտվում է։ Կեսօրին տարբեր զինատեսակներից, հիմնականում՝ «Գրադ» և «Սմերչ» կայանքներից, ադրբեջանական զինուժը հրթիռակոծել է Շուշի քաղաքը: Ի թիվս բազմաթիվ ավերածությունների, մասնակի վնասվել է նաև բերդաքաղաքի պարսկական «Գոհար աղա» մզկիթը։ Ռազմական ավիացիա է կիրառվել նաև Մարտակերտում։ Քաղաքը հերթական անգամ ենթարկվել է ռմբակոծության։ Այստեղ ևս քաղաքացիական բնակչության շրջանում տուժածներ չկան։ Պայթյուններ հնչել են նաև Ստեփանակերտում։ Տուժածներ չկան։ Օրվա ընթացքում միայն մայրաքաղաքում 7 անգամ հնչել է օդային տագնապի ազդանշանը։

 

ԱՀ/ԼՂ արտակարգ իրավիճակների պետական ծառայությունը տեղեկացրել է, որ Արցախի բնակավայրերում իրավիճակը հարաբերական հանգիստ է։ Միայն Մարտունու ուղղությամբ Ադրբեջանը պարբերաբար տարբեր զինատեսակներից կրակ է բացել։ Ստեփանակերտում հնչած կրակոցներից տուժածներ չկան։

 

Հայկական միասնական տեղեկատվական կենտրոնը տեղեկացրել է, որ ադրբեջանական զինուժը Շուշիում թիրախավորել է մշակութային և կրթական օբյեկտներ՝ Գոհար տիկնոջ Վերին մզկիթը, Եզնիկ Մոզյան արհեստագործական ուսումնարանը, Շուշիի տեխնոլոգիական համալսարանը:

 

ԱՀ/ԼՂ արտակարգ իրավիճակների պետական ծառայությունը տեղեկացրել է, որ ադրբեջանական զինուժը շարունակում է թիրախավորել ոչ միայն խաղաղ բնակավայրերն ու բնակիչներին, այլև՝ հերթական անգամ Արցախի ԱԻ պետական ծառայությանը: Հրթիռակոծվել է Ասկերանի շրջանային արտակարգ իրավիճակների բաժնի հրշեջ մեքենան: Փրկարար ծառայողները մարդասիրական նպատակներով խմելու ջուր էին հասցնում շրջանի խաղաղ բնակիչներին: Անօդաչու թռչող սարքի 1 հրթիռ ընկել է ուղիղ հրշեջ մեքենայի վրա և այրել: Բարեբախտաբար անձնակազմը չի տուժել: Նշվում է նաև, որ պատերազմի հենց առաջին օրերից ադրբեջանական զինուժի նշանակետում նաև հումանիտար առաքելություն իրականացնող փրկարար ծառայողներն են:

 

ԱՀ/ԼՂ ՄԻՊ Արտակ Բեգլարյանը Թվիթերի իր միկրոբլոգում թարմացված տվյալներ է հրապարակել ԱՀ/ԼՂ-ի 160 համայնքում Ադրբեջանի կողմից խաղաղ բնակչության մարդկային և նյութական կորուստների վերաբերյալ: Ըստ այդմ՝ խաղաղ բնակիչների շրջանում  կա 45 զոհ, 141 վիրավոր, վնասված կամ ավերված 13.100 տուն / բնակարան, 2.700 ենթակառուցվածք, 2.000 մեքենա: Ադրբեջանցիները շարունակում են թիրախավորել քաղաքացիական օբյեկտները,- գրել է Արտակ Բեգլարյանը:

 

ՀՀ ՄԻՊ Արման Թաթոյանը նոյեմբերի 1-ին աշխատանքային հանդիպում է ունեցել «Մեկ ազատ աշխարհ» (One Free World International) միջազգային իրավապաշտպան կազմակերպության հիմնադիր Մաջեդ Էլ Շաֆիի և Իսլանդիայի խորհրդարանի անդամ Բիրգիր Թորարինսոնի հետ: «Խաղաղ բնակչությանը թիրախավորելն ու նրանց նկատմամբ արգելված զինատեսակներ կիրառելը, վարձկան ահաբեկիչների ներգրավումը, հայատյացությունն ու ադրբեջանական զինված ուժերի վայրագություններն ու անմարդկային վերաբերմունքը վկայում են, որ խնդիր է դրված Արցախում իրականացնել էթնիկ զտում ահաբեկչական մեթոդներով»,- նշել է Մարդու իրավունքների պաշտպանը: Հանդիպմանը Արման Թաթոյանը ներկայացրել է փաստեր խաղաղ բնակիչների նկատմամբ Ադրբեջանի զինված ուժերի վայրագությունների ու հանցագործությունների, այդ թվում՝ արգելված զինատեսակների կիրառության, քաղաքացիական բնակչության թիրախավորման և ենթակառուցվածքների ավերածությունների վերաբերյալ։ Հանդիպման մասնակիցները ընդգծել են մարդու իրավունքների պաշտպանության ոլորտում համագործակցության կարևորությունը և ձեռք են բերել համագործակցության նոր պայմանավորվածություններ:


Ավելի վաղ Արման Թաթոյանը հրապարակել էր Associated Press-ի տեսանյութը՝  որպես  անժխտելի ապացույց Արցախի խաղաղ բնակչության նկատմամբ թիրախային հարձակումներով ադրբեջանական զինված ուժերի պատերազմական հանցագործությունների, Արցախում ահաբեկչական մեթոդներով էթնիկ զտում իրականացնելու քաղաքականության մասին:

 

Այսպիսով՝ ըստ ԱՀ/ԼՂ ՄԻՊ-ի տվյալների մինչ օրս  ադրբեջանական ագրեսիային զոհ են գնացել ընդհանուր թվով 45 խաղաղ բնակիչ. 43-ը՝ ԱՀ/ԼՂ-ում,  2-ը՝ ՀՀ-ում:

 

Լուսանկարում՝ Անօդաչու թռչող սարքի 1 հրթիռ ընկել է ուղիղ հրշեջ մեքենայի վրա և այրել

 

Դիտումներ՝ 209

Leave a Reply

Your email address will not be published. Required fields are marked *

Հետադարձ կապ

Ընտրել համապատասխան կապը

  • ???????
    A A A
  • ?????????
    arial verdana tahoma
  • ???????????
    regular light bold
  • ??????????????
    1px 2px 3px
  • ???????? ?????
    ???? ??????? ??? ???????? ??? ???
  • ???? ??????
  • ?????? ??????