Հելսինկյան քաղաքացիական ասամբլեայի Վանաձորի գրասենյակ

Հելսինկյան քաղաքացիական ասամբլեայի Վանաձորի գրասենյակի հաղորդման հիման վրա Ոստիկանության Վանաձոր քաղաքի Տարոնի բաժնում 2019 թ․ դեկտեմբերի 9-ին քրեական գործ է հարուցվել՝ երկրաշարժից տուժած Վահագնիի 6 ընտանիքի բնակարանի իրավունքից զրկելու փաստի առթիվ։

ՀՔԱ Վանաձորի գրասենյակը 2019 թ․ նոյեմբերի 12-ին հանցագործության մասին հաղորդումը ներկայացրել էր Ազատություն ռադիոկայանի 88-ի աղետից տուժած մոտ 30 ընտանիքների տնակները փաստաթղթերում դարձել են քարե բնակելի տներ հրապարակման հիման վրա։

Ազատության անդրադարձը

Դատախազություն հաղորդում ներկայացրած իրավապաշտպան Արթուր Սաքունցը կարևոր է համարում պարզել, թե արդյո՞ք փաստաթղթերում քարե տուն դարձած տնակների տերերի անուններով պետությունը խոշոր գումար չի առանձնացրել ու դարձյալ կեղծ փաստաթղթեր կազմել, իբրև թե նրանց համար տուն է կառուցվել կամ տան փոխհատուցում տրվել։

«Թե ինչի հետևանքով են մարդիկ տարիներ շարունակ մնացել առանց բնակարանի, այ դրա պատճառները պետք է բացահայտել, և դա ուղղակիորեն առնչություն ունի համակարգային կոռուպցիայի հետ, որի դրսևորումներից մեկը հանդիսացել է աղետի գոտում բնակարանների շինարարության համար ֆինանսների յուրացմամբ», - նկատեց Սաքունցը:

«Այնպես չէ, որ կառավարությունը ֆինանսներ հատկացրեց բնակարաններ կառուցելու համար, իսկ նախկինում հատկացված գումարները պետք է մնան էտպես անհետևանք կամ առանց ուսումնասիրության: Մեր նպատակն է այդ հատկացված գումարների ճակատագիրը որոշելու, դրանցում պատասխանատու անձանց բացահայտելու և գումարները վերադարձնելու պետական բյուջե», - շեշտեց իրավապաշտպանը: