Հելսինկյան քաղաքացիական ասամբլեայի Վանաձորի գրասենյակ

❓Եթե հղիության և ծննդաբերության արձակուրդում գտնվող կինը ունի նաև մեկ երեխա, ամուսինը գրանցված աշխատող չէ, նպաստ չեն ստանում, կարո՞ղ են ստանալ մեկ երեխայի համար նախատեսված գումարը։

Պատասխան

Ոչ։

ՀՀ աշխատանքային օրենսգրքի համաձայն՝  գործատուի և աշխատողի միջև աշխատանքային հարաբերութունները դադարում են, երբ լուծվում է նրանց միջև կնքված աշխատանքային պայմանագիրը։

Աշխատողին տրամադրվող հղիության և ծննդաբերության արձակուրդը, ինչպես նաև մինչև երեք տարեկան երեխայի խնամքի համար տրամադրվող արձակուրդը համարվում են նպատակային արձակուրդ, որի ժամանակ պահպանվում է աշխատողի աշխատատեղը, բացառությամբ կազմակերպության լուծարման դեպքի:

ՀՀ Կառավարության 2020 թվականի ապրիլի 2-ի թիվ 427-Լ որոշմամբ աջակցություն է տրամադրվում մինչև 18 տարեկան այն երեխաներին, որոնց ծնողները (միայնակ ծնողը) չունեն գրանցված աշխատանք։  Կորոնավիրուսի տնտեսական հետևանքների չեզոքացման յոթերորդ միջոցառումը հաստատելու մասին ՀՀ Կառավարության 2020 թվականի մարտի 30-ի թիվ 411-Լ որոշմամբ «Միջոցառման շահառու է հանդիսանում հղի կինը, ով 2020 թվականի մարտի 30-ի դրությամբ չունի աշխատանք և ում ամուսինն ազատվել է աշխատանքից 2020 թվականի մարտի 13-ից մինչև 2020 թվականի մարտի 30-ն ընկած ժամանակահատվածում և չի անցել մեկ այլ աշխատանքի նույն ժամանակահատվածում։ Միջոցառման շահառու է հանդիսանում նաև միայնակ հղի կինը, ով 2020 թվականի մարտի 30-ի դրությամբ չունի աշխատանք»։

Տվյալ դեպքում կինը գտնվում է նպատակային արձակուրդում և գործատուի հետ աշխատանքային հարաբերությունները չեն դադարել, հետևաբար ընտանիքը չի կարող հանդիսանալ ծրագրի շահառու։

• ՀՀ Կառավարության 2020 թվականի մարտի 30-ի թիվ 411-Լ որոշման հղում՝ https://www.e-gov.am/u_files/file/decrees/kar/2020/03/411.pdf։
• ՀՀ Կառավարության 2020 թվականի ապրիլի 2-ի թիվ 427-Լ որոշման հղում՝ https://www.e-gov.am/gov-decrees/item/33694/։