Հելսինկյան քաղաքացիական ասամբլեայի Վանաձորի գրասենյակ
ԱԺ-ում առաջին անգամ հստակ դիրքորոշում դրսեւորվեց քրեական վարքագծի ու բառապաշարի դեմ
Իրավապաշտպան Արթուր Սաքունցը կարծում է, որ զրո հանդուրժողականություն պետք է լինի քրեական կեցվածքի, բառապաշարի նկատմամբ։ Անդրադառնալով նախօրեին ԱԺ-ում տեղի ունեցած միջադեպին, Lragir.am-ի հետ զրույցում Արթուր Սաքունցը նշել է, որ պետք է անպայման տրվեր քաղաքական և իրավական գնահատական պետության զավթմանը, և այդ բոլոր ինստիտուտները, որոնք պատասխանատու են եղել պետության զավթման համար, ամրագրված լինեին այդ գնահատականում։
«Այդ պարագայում դա կլիներ այն ելակետային փաստաթուղթը, որի վրա պետք է կառուցվեին այս բոլոր առանձին իրավական նախագծերը։ Այս դեպքում խոսքը ոչ միայն իրավական համակարգի, այլև կրթական համակարգի, տնտեսական համակարգի մասին է։ Այդ պարագայում, նման գործողությունները չէին կարող համարվել լեգիտիմ, որովհետև Ազգային ժողովն արդեն տված կլիներ գնահատական, թե ինչպիսին չի կարող լինել պատգամավորների պահվածքը, որովհետև դա պետության զավթմանը բնորոշ վարքագիծ ու մտածելակերպ է։ Իսկ այն, որ քրեական աշխարհը պետության զավթման ժամանակահատվածում հիմնական գործիքներից և ինստիտուտներից մեկն է եղել իշխանության ձեռքին, դա փաստ է։ Դա այնքան բացահայտ փաստ է, որ դրա մասին բազմաթիվ հրապարակումներ կան, լուսանկարներ կան, զեկույցներ կան և այլն։ Ի վերջո, 10 մլրդ դոլարը հենց այնպես չի գնացել Հայաստանից։ Իրավապահ համակարգը, ըստ էության, անգործության է մատնված եղել պետության դեմ կատարված հանցագործությունների կանխման և բացահայտման հարցում, որովհետև նրանք ենթարկվել են պետությունը զավթողներին։ Այս հարցում նրանց գործընկերը եղել է քրեական աշխարհը։
Կարևոր է, որ այս ԱԺ-ում առաջին անգամ հստակ դրսևորվեց դիրքորոշումը, որ անթույլատրելի է համարվում քրեական գործելակերպի, բառապաշարի, վարքագծի դրսևորումը։ Այսինքն՝ զրո հանդուրժողականություն քրեական կեցվածքի, բառապաշարի նկատմամբ։ Սա շատ կարևոր է»,-հավելել է նա։
Հետադարձ կապ
Հելսինկյան քաղաքացիական ասամբլեայի Վանաձորի գրասենյակ
(+374) 322 4 22 68
ՀՔԱ Վանաձորի գրևասենյակի Երևանյան ներկայացուցչություն
(+374) 11 24 22 68
