Հելսինկյան քաղաքացիական ասամբլեայի Վանաձորի գրասենյակ

2024թ․-ի հունվարին “Ուղղակի ժողովրդավարություն” ՀԿ-ի նախագահ  Գևորգ Քոթանջյանը իր ֆեյսբուքյան էջում հայտնել էր, որ   2022 թվականի դեկտեմբերի 14-ին Վանաձորի ավագանին հաստատել է Վանաձորի թիվ 4 տնակային մանկապարտեզի կառուցման սուբվենցիան, իսկ  2023 թվականի նոյեմբերի 29-ին՝ մանկապարտեզի կառուցման երկրորդ փուլի հայտը։ Քոթանջյանը  նշել է, որ Վանաձորի Համայնքապետարանի պաշտոնական կայքէջում  որոշումների արձանագությունների մեջ 2022 թվականի դեկտեմբերի 14-ի որոշումներում այս մանկապարտեզին վերաբերող արձանագրություն առկա չի եղել։ Ավելին՝ Քոթանջյանը կցել է տարբեր ժամանակահատվածներում մանկապարտեզի նկարները, որոնցից ակնհայտ երևում է, որ կառուցապատման աշխատանքներ  չեն կատարվել։ Ըստ որոշման՝  առաջին փուլում պետք է քանդվեր մանկապարտեզը, երկրորդում՝ դրվեր նոր մանկապարտեզի հիմքը։

Հրապարակման հիման վրա ՀՔԱՎ գրասենյակը հանցագործության մասին հաղորդում է ներկայացրել ՀՀ Գլխավոր դատախազություն։ Վերջինս ներկայացված հանցագործության մասին հաղորդման հիմքով քրեական վարույթ չի նախաձեռնել և այդ մասին Կազմակերպությանը օրենքով սահմանված կարգով չի իրազեկել։ Փոխարենը՝ մեր ներկայացրած հաղորդումը վերահասցեագրել է ՀՀ ՆԳՆ ոստիկանության Լոռու մարզային վարչության Վանաձոր քաղաքի Տարոնի բաժին, որպեսզի կատարվեն ստուգողական գործողություններ։ Ի պատասխան՝ Տարոնի բաժինը ընդամենը մեկ գրություն է ուղարկել, որ ավագանու  որոշումը առկա է և հրապարակված է համայնքապետարանի պաշտոնական կայքէջում։ 

Նշենք, որ հանցագործության մասին հաղորդումը վերաբերել է հաստատված սուբվենցիայի շրջանակներում շինարարական աշխատանքներ չկատարելուն։ ։ Այսինքն,  ՀՀ ՆԳՆ ոստիկանության Տարոնի բաժնի կողմից չի ներկայացվել  պատշաճ տեղեկություն  փաստի վերաբերյալ իրենց կողմից կատարված  ուսումնասիրությունների մասին։ Բացի այդ նշված է, որ արձանագրությունները այս պահին հրապարակված են, սակայն հրապարակված է 2-րդ փուլի որոշումը, իսկ 1-ին փուլի որոշումը, որով սահմանված է 80 682 780 ՀՀ դրամ կազմող սուբվենցիան, բացակայում է։

Կազմակերպությունը վարույթ չնախաձեռնելու մասին որոշումը 2024թ․ մարտի 3-ին ստացել է Տարոնի բաժնից, մինչդեռ ՀՀ քրեական դատավարության օրենսգիրքի 179-րդ հոդվածի 3-րդ մասի համաձայն քրեական վարույթ չնախաձեռնելու մասին քննիչը պետք է անհապաղ գրավոր տեղեկացնի հաղորդումը ներկայացրած անձին՝ նշելով քրեական վարույթ չնախաձեռնելու հիմքերը,  նաև պարզաբանել վարույթ նախաձեռնելուց հրաժարվելու  բողոքարկելու կարգը և ժամկետները։ 

2024թ․ մարտի 4-ին Կազմակերպությունը ՀՀ գլխավոր դատախազություն քրեական վարութ չնախաձեռնելու դեմ բողոք է ներկայացրել։ Բողոքը վերահասցեագրվել է ՀՀ Լոռու մարզի դատախազություն։ Դատախազությունը 2024թ․ մարտի 22-ին պատասխանել է,որ բողոքը ենթակա է մերժման ժամկետանց լինելու հիմքով և որպես ժամկետ պետք է հիմք ընդունել ՀՀ ՆԳՆ ոստիկանության Տարոնի բաժնին ուղղված գրության ամսաթիվը։ Մինչդեռ ՀՀ քրեական դատավարության օրենսգրքով սահմանվում  է պարտադիր օրենսդարական պահանջ, որ իրազեկումը պետք է կատարեր քննիչը։

Արդյունքում վարույթի հանրային մասնակիցները՝ դատախազը և քննիչը գործել են օրենքի էական խախտմամբ, դրսևորել են ոչ իրավաչափ վարքագիծ՝ չպահպանելով քրեադատավարական օրենսգրքի պահանջները։

 2024թ․ ապրիլի 25-ին Կազմակերպությունը բողոք է ներկայացրել Առաջին ատյանի ընդհանուր իրավասության դատարան։ Դատարանը 2024թ․ մայիսի 20-ին մերժել է կԿազմակերպության  բողոքը՝ իրավաչափ համարելով դատախազության կողմից քրեական վարույթ չնախաձեռնելու որոշումը։ 

Առաջին ատյանի որոշման դեմ ՀՔԱՎ-ը ներկայացրել է վերաքննիչ բողոք։ Վերաքննիչ դատարանը ամբողջովին բավարարել է Կազմակերպության բողոքը, փաստելով, որ քննչական ենթակայության կանոններին համապատասխան Լոռու մարզի դատախազությունը Կազմակերպության հաղորդումը պետք է վերահասցեագրեր իրավասու քննչական մարմնի ղեկավարին՝ քրեական վարույթ նախաձեռնելու հարցը լուծելու համար։ Ուստի Առաջին ատյանի դատարանը թույլ է տվել քրեադատավարական օրենքի էական խախտում, որը հիմք է դատական ակտը բեկանելու համար։ 

2024թ.-ի օգոստոսի 16-ին Գլխավոր դատախազի տեղակալը բճռաբեկ բողոք է ներկայացրել։ Բողոքը վարույթ ընդունելու կամ չընդունելու մասին դեռևս որոշում չկա։