Helsinki Citizens' Assembly-Vanadzor

menu

Զոհված զինվորների ծնողներին Եռաբլուրում բերման ենթարկած ոստիկանների արարքում ՔԿ-ն հանցակազմ չի գտել

November 23, 2023

Լրատվամիջոցները մեր մասին | Տեսադարան

Ավելի քան մեկ տարվա քննությունից հետո Քննչական կոմիտեն հանցակազմ չի գտել այն ոստիկանների գործողություններում, որոնք Անկախության օրը բիրտ ուժով բերման էին ենթարկել պատերազմում զոհված զինվորների ծնողներին։ Որդեկորույս ծնողներն այդ օրը ի նշան բողոքի փորձել էին փակել վարչապետ Փաշինյանի ճանապարհը դեպի «Եռաբլուր» զինվորական պանթեոն։

 

Քննչականից «Ազատությանն» ասացին՝ քննիչը Դատախազությանն առաջարկել է ոստիկանների դեմ հետապնդում չհարուցել։

 

«Կանանց ձեռք ու ոտքը բռնած քարշ էին տալիս, ձեռքերը ցավեցնում, այդտեղ հանցակազմ չկա՞ր: Կասկած էլ չունեի, որ կկարճեին էդ գործը», - ասում է նախորդ տարի այդ օրը բերման ենթարկված ծնողներից Վահիդ Սահակյանն ու շարունակում՝ չի բողոքարկելու, հոգնել է իրավապահների դռները թակելուց:

 

«Որոշումը սպասելի էր, քանի որ իրավապահ համակարգը էսօր ղեկավարվում է մի կետից, իսկ էդ կետը գիտեք, որ հենց ինքը Նիկոլ Փաշինյանն է՝ վարչապետն է», - «Ազատության» հետ զրույցում ասաց Սահակյանը՝ հավելելով. - «Արդեն հոգնել ենք էս բողոքարկումներից, ամբողջ օրը դատական պրոցեսների մեջ ենք: Մեր ցավը թողած՝ ընկել ենք, եսիմ, չեմ էլ իմանում, էլի, ցավին ցավ պատճառելով: Մարդ ուժասպառ է լինում էդ ամեն ինչից»:

 

Անցած տարի այդ միջադեպից հետո երեք տասնյակից ավելի հասարակական կազմակերպություններ միացել ու ոստիկանապետ Վահե Ղազարյանի պաշտոնանկությունն էին պահանջել, ընդգծելով՝ եթե նա չազատվի աշխատանքից, ապա ամբողջ պատասխանատվությունն ընկնում է անձամբ վարչապետ Նիկոլ Փաշինյանի վրա: Հայտարարությունը ստորագրողներից մեկն էլ Իրազեկ քաղաքացիների միավորումն էր, որի ղեկավար Դանիել Իոաննիսյանն այսօր էլ պնդեց՝ պահանջն ուժի մեջ է:

 

«Ոստիկանների այդ օրվա արարքում կար քրեորեն պատժելի արարք, հանցակազմն ակնհայտ էր, բայց նրանք չպատժվեցին», - ընդգծեց Իոաննիսյանը։

 

«Հայաստանում որևիցե ոստիկան, որը որ ցուցարարի նկատմամբ բռնություններ է գործադրել, բաժիններում քաղաքացիներին խոշտանգող ոստիկանները պատասխանատվության չեն ենթարկվում: Դա գլոբալ խնդիր է, և ըստ էության՝ նաև այն, որ Եռաբլուրի դեպքերից հետո ոստիկանապետը ոչ միայն պաշտոնանկ չարվեց, այլև նշանակվեց ներքին գործերի նախարար, նաև քաղաքական ուղերձ էր ամբողջ ոստիկանական համակարգին, որ այս մեթոդը ընդունելի է», - ասաց Դանիել Իոաննիսյանը:

 

Վահե Ղազարյանի պաշտոնանկությունը պահանջողներից է նաև Հելսինկյան քաղաքացիական ասամբլեայի Վանաձորի գրասենյակը: Արթուր Սաքունցն ասում է՝ որդեկորույս ծնողներին Եռաբլուրից ուժով հեռացնելու կադրերը մեկնաբանության կարիք չունեն: Իրավապաշտպանը խայտառակություն է որակում այն, որ Քննչականը նրանց արարքներում հանցակազմ չի գտել:

 

«Եթե պատասխանատվության չեն ենթարկվում, ապա այդ բռնությունները անխուսափելիորեն շարունակվելու են: Եվ հիմա Ոստիկանությունը, Ներքին գործերի նախարարությունը քարտ բլանշ է ստանում այն իմաստով, որ «կարող եք, շարքային ոստիկաններ, բռնություններ գործադրել, մնալ անպատիժ», - «Ազատության» հետ զրույցում հայտարարեց Սաքունցը:

 

Պատասխանատվությունը, ըստ իրավապաշտպանի, «մնում է անձամբ վարչապետի վրա, որովհետև խոստումները ժողովրդավարության մասին, իրավական պետության մասին առնվազն հիմքեր չունեն հենց այս դեպքի փաստով, որովհետև սա արդեն ոչ թե շարքային դեպքերից մեկն է, որը կատարվել է ինչ-որ շարքային ոստիկանի կողմից, այլ՝ բարձրաստիճան ոստիկանների անմիջական հսկողությամբ և մասնակցությամբ է տեղի ունեցել»:

 

Վահիդ Սահակյանն, իր հերթին, ընդգծում է՝ Վարչական դատարանը մերժել է Ոստիկանության հայցը, որում պնդել էին, թե ծնողները ոստիկանի օրինական պահանջին չեն ենթարկվել: «Դատարանը համարեց, որ ոստիկանների պահանջն օրինական չի եղել», - ասում է ու տարակուսում՝ հիմա այդ նույն ոստիկաններն անմեղ ե՞ն դուրս եկել:

 

«Ամենաամոթալի էջն էր Ոստիկանության համակարգի համար», - նշեց Սահակյանը:

 

Իշխանական պատգամավորներ Արթուր Հովհաննիսյանն ու Գևորգ Պապոյանն ասացին՝ իրավական գործընթաց է, չեն մեկնաբանի, բայց քաղաքական գնահատական կտան:

 

«Նախկինում դուք երբեք անգամ գործի քննության մանրամասներին չէիք կարող տեղյակ լինել», - նշեց Հովհաննիսյանը:

 

«Եթե դուք գտնում եք, որ ոստիկանության ներկայացուցիչները Հայաստանի Հանրապետության քաղաքացուն գրկելով Ա կետից տեղափոխում են Բ կետ, և էդտեղ կա հանցակազմ, ես առաջարկում եմ, որ անպայման դիմեք իրավապահ մարմիններին՝ նորից քննություն անցկացնել և եթե կան նոր հանգամանքներ՝ էդ հանգամանքների շուրջ: Որովհետև մենք որևէ խնդիր չունենք այս կամ այն հարցի շուրջ խորանալու», - ասաց Պապոյանը:

 

Այդ կադրերը բոլորս ենք տեսել՝ կարճ արձագանքեց այդ օրը Եռաբլուրից բերման ենթարկված Վահիդ Սահակյանը, դա գրկե՞լ էր, հարցնում է նա. - «Նման բան չի եղել, իհարկե, կարելի էր շատ կուլտուրական ձևի երկուսով թևանցիկ մտնեին, հանգիստ տանեին, եթե պիտի տանեին, այլ ոչ թե չորս հոգով տանեին ու շպրտեին...»:

 

Դիտումներ՝ 84

Leave a Reply

Your email address will not be published. Required fields are marked *

Հետադարձ կապ

Ընտրել համապատասխան կապը

  • ???????
    A A A
  • ?????????
    arial verdana tahoma
  • ???????????
    regular light bold
  • ??????????????
    1px 2px 3px
  • ???????? ?????
    ???? ??????? ??? ???????? ??? ???
  • ???? ??????
  • ?????? ??????