Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն իր ֆեյսբուքյան էջում հրապարակում էր կատարել այն մասին, որ Մարտի 1-ի գործով ամենամեծ բացթողումը մեղադրյալի կարգավիճակում Սերժ Սարգսյանին չներգրավվելն էր:

Հատված հրապարակումից. «Մարտի 1-ի գործով դատավարության ամենահիմնական և միակ բացթողումը նրանում է, որ Սերժ Սարգսյանը որպես մեղադրյալ ներգրավված չէ նշված քրեական գործում, որպես 2008թ. մարտի 1-ին թե որպես ՀՀ վարչապետ, թե որպես ՀՀ նախագահի թեկնածու, որի նախագահության համար էլ տեղի է ունեցել սահմանադրական կարգի բռնի զավթումը»:

365news-ի հետ զրույցում Սաքունցը նշեց, որ գլխավոր դատախազն ու Հատուկ քննչական ծառայությունը պետք է պատասխանեն այն հարցին, թե ինչո՞ւ Սերժ Սարգսյանին մեղադրյալի կարգավիճակում չեն ներգրավվել:

«Ես ուղղակի արձանագրում եմ, որ որևէ տրամաբանության մեջ չի տեղավորվում, երբ որ այդ ամենը, այդ պետական ահաբեկչությունն իրականացվում էր, և դա իրականացվում էր զուտ այն բանի համար, որ Սերժ Սարգսյանը դառնա Հանրապետության նախագահ, և ինքը նաև պաշտոնատար անձ է եղել՝ երկրորդ դեմքն, ըստ էության, և նաև նախագահի թեկնածու, ներգրավված չէ այդ քրեական գործում:

Առնվազն, ոչ միայն որպես մասնակից, այլ նաև իրազեկ մարդ, որ գուցե և չի մասնակցել, այլ բացարձակապես անգործության է մատնված եղել: Այսինքն՝ չկա որևէ պատճառ, հանգամանք, որը կարող է բացառել նրա՝ այդ գործում ներգրավված չլինելը»:

Սաքունցը նշեց, որ Սերժ Սարգսյանն առնվազն դրսևորել է կանխամտածված անգործություն: Նա համոզված է, որ չկա որևէ հանգամանք, որը կարող էր բացառել Սերժ Սարգսյանի մեղսակցությունն այդ պետական ահաբեկչության մեջ:

365news.am