Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

«Սահմանադրական փոփոխությունների հայեցակարգը պետք է պատրաստ լինի մինչև տարեվերջ, և թե ինչ կառավարման մոդել կլինի հայաստանում, հայտնի կդառնա այդ հայեցակարգի նախագծով»,- «Սահմանադրական փոփոխությունների անհրաժեշտությունը․ ո՞ւմ և ինչի համար են փոխվում գլխավոր կանոնները» թեմայով քննարկմանն այս մասին նշեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:

Նրա դիտարկմամբ՝ անկախ կառավարման մոդելից, անցած 30 տարիների ընթացքում ձախողվել է իշխանությունների տարանջատման և փոխզսպման սկզբունքը:

«Մեր որևէ Սահմանադրություն, նաև ներկայումս գործողը, չի երաշխավորում իշխանությունների տարանջատման և փոխզսպման սկզբունքը, սա է ամենամեծ խնդիրը և ձախողումը, և ամենամեծ դասը պետք է սրանից քաղել. որպես ելակետային դրույթ այս սկզբունքը պետք է ընդունվի դիրքորոշում արտահայտելիս և որոշումներ կայացնելիս:

Իշխանության ամենից կարևոր երկու ճյուղերը երբեք Սահմանադրության մակարդակով երաշխավորված անկախություն չեն ունեցել. դատական իշխանությունը մշտապես գտնվել է գործադիր իշխանության հսկողության ներքո՝ մեխանիզմների առումով գործադիր իշխանությունը դատական իշխանության վրա ունեցել է ուղղակի և անուղղակի ազդեցության լծակներ՝ անկախ կառավարման մոդելից:

Մենք չենք ունեցել նաև օրենսդիր մարմինների երաշխավորված լիակատար անկախություն. խորհրդարանական մեծամասնությունը միշտ ունեցել է բացարձակ իշխանություն,- նշեց Սաքունցը: Նրա խոսքով՝ միակուսակցական մտածելակերպը քաղաքական մշակույթում հաղթահարված չէ. հակակշիռներ չկան: