Հելսինկյան քաղաքացիական ասամբլեայի Վանաձորի գրասենյակ

Մինչ կենտրոնական ընտրական հանձնաժողովի նախագահը հայտարարում է, թե Տիգրան Ավինյանի օգտին ընտրողների ցուցակագրումը Սպիտակում ու հարակից գյուղերում վարչական ռեսուրսի չարաշահում չէ, այս բացահայտման հեղինակները շարունակում են հակառակը պնդել։

Ավելին` ընտրական գործընթացները դիտարկող «Անկախ դիտորդ» դաշինքի անդամ Վարդինե Գրիգորյանը տարակուսած է՝ ինչպե՞ս կարող է Կենտրոնական ընտրական հանձնաժողովի նախագահը նման հրապարակային կարծիք հայտնել՝ դրանով իսկ ազդելով հարցի քննության վրա։

«Սա մեկնաբանելու իրավասություն ունի ԿԸՀ-ն ու պետք է օգտագործի այդ հնարավորությունը՝ նաև ապացուցելու, որ ինքը կողմնակալ չի: Մեր ԿԸՀ -ն այս դեպքում, իհարկե, ապացուցելու շատ բան ունի, որովհետև հստակ է, որ մենք ունենք այդ կանխավարկածն ու վերաբերմունքը: Ակնհայտ է, որ մենք չենք կարող փոխել մեր վերաբերմունքն իր կուսակցականության նկատմամբ, քանի դեռ չենք տեսել հակառակ վարքը», - ասաց Գրիգորյանը:

Շաբաթներ առաջ մեծ աղմուկ հանած հետաքննական հրապարակման հեղինակները պատմել էին, թե ինչպես են Սպիտակի քաղաքապետն ու փոխքաղաքապետը գյուղերի վարչական ղեկավարների հետ միասին ցուցակագրում մարզերում բնակվող, բայց Երևանում հաշվառված՝ Ավինյանին ձայն տվող ընտրողներին։

Որպես իշխանական Գևորգ Պապոյանի օգնական ներկայացած «Փաստերի ստուգման հարթակի» լրագրողը զանգահարել էր խոշորացված Սպիտակի փոխքաղաքապետին, 15 գյուղերի վարչական ղեկավարներին։ Նրանցից առնվազն վեցը հայտնել էին, որ արդեն ունեն կամ շուտով կունենան Ավինյանի օգտին քվեարկողների ցուցակները։ Եվ Սպիտակի փոխքաղաքապետ Հովիկ Հովհաննիսյանը վստահեցրել էր, որ իր անմիջական ղեկավարը՝ Սպիտակի քաղաքապետ Քաջայր Նիկողոսյանը, զբաղվում է այս հարցով։

Ձայնագրություն. - Նիկողոսյանը նորմալ աշխատո՞ւմ ա էդ ուղղությամբ:

- 100 տոկոս, Սևակ, ինքն ա էդ պարտականությունը կատարում:

- Մի խոսքով դու գարանտիա ես տալի՞ս իրա վրա:

- Ես, ախպերս, քեզ ասում եմ էն, ինչը հիմա արվում ա:

Կենտրոնական ընտրական հանձնաժողովի նախագահ Վահագն Հովակիմյանն օրերս լրագրողներին ասել էր՝ անձամբ է լսել ողջ ձայնագրությունն ու եզրահանգել՝ խախտում չկա, բայց նաև շտապել էր հավելել՝ սա իր կարծիքն է, ու որպեսզի ԿԸՀ-ն եզրահանգում անի, իրենց գրավոր դիմում պետք է ուղարկեն։

«Իմ անձնական կարծիքով այդ ձայնագրությունում վարչական ռեսուրսի չարաշահման փաստ, կրկնում եմ, մի բան է ձեր պատկերացմամբ կամ ցանկացած քաղաքացու պատկերացումը վարչական ռեսուրսի օգտագործման վերաբերյալ, մեկ այլ բան է օրենսդրությունը», - ասել է Հովակիմյանը:

Նույն կարծիքն էին հայտնել շաբաթներ առաջ Վահագն Հովակիմյանի նախկին կուսակիցները։ «Քաղաքացիական պայմանագրի» վարչության փոխնախագահ Գևորգ Պապոյանը հերքել էր, որ ցուցակագրել են Ավինյանի ընտրողներին ու հայտարարել՝ Սպիտակի քաղաքապետն ու վարչական շրջանների ղեկավարները կուսակցականներ են և կարող են զբաղվել քաղաքականությամբ։